Evo danas je na Radio Splitu, Ivica Ursić najavija izlazak zbirke pjesama pod nazivom «Škatula o' postoli».
Iako san na toj knjizi radija dosta vrimena, tek danas kad je Ivica pročita dvi pisme, onako s dušom kako samo on zna, cili san se naježija, jedva san se susprega da ne zaplačem.
Dunkve, moj otac punih 50 godin piše pisme i stivaje ih u jednu staru škatulu o' postoli. Došlo je vrime da rukom ispisani, požutjeli papir iz škatule izađe tiskan u libar.
Amo reč da je danas pretpremijera ovega libra.
Škatula o' postoli
Srce mi je vazela škatula o' postoli,
Skrila moje tajne, jubavi i boli.
Godinan san meća u nju svoje riči,
Kad san bija sritan, kad bi dušu liči.
Nevere i bure sve su u nju stale,
Svitla i bonace ča su misli slale.
I naciklo srce u mojoj samoći,
I osmih na licu i suza u noći.
Na staron škartocu još mi pisme čuva,
Rani moju dušu pinkon crna kruva.
I sva moja mladost i jubav ča voli,
Slila se u tami škatule o' postoli.
Toliko za početak o škatuli.
Zdravi i veseli bili.
PS.
Ivice, od srca ti fala.
|
